Kandidati për kryetar të Prishtinës, Uran Ismaili, ka thënë se posedon aftësinë dhe përvojën menaxheriale për të zgjidhur njëherë e përgjithmonë problemet e mëdha me të cilat kryeqyteti është përballur për vite të tëra.

Ai theksoi se qytetarët e Prishtinës meritojnë një jetë më të mirë dhe se është i bindur se mund ta nxjerrë kryeqytetin nga kaosi në të cilin ndodhet.

Duke foli për premtimin e tij “prej betonit te komuniteti”, ku është zotuar se do të pezullojë për gjashtë muaj të gjitha lejet e reja të ndërtimit, për të krijuar mundësinë e një planifikimi të rregullt urban.

Ai sqaroi se lejet ekzistuese nuk do të preken, por theksoi se Prishtina duhet të ndërtohet me plan dhe me rregull.

“Shumica e lagjeve të ndërtuara sot nuk kanë infrastrukturë mbështetëse – nuk kanë parqe, çerdhe, ndriçim, apo hapësira sociale. Komuna ka dhënë leje pa menduar për pasojat dhe pa vendosur infrastrukturën e nevojshme. Pezullimi prej 6 muajsh është i domosdoshëm që ndërtimet e reja të planifikohen më mirë dhe t’u ofrojnë qytetarëve, rrugë, ndriçim, parqe, çerdhe, gjelbërim dhe infrastrukturë sociale dhe një jetë më kualitative në përgjithësi,” tha ai.